பேராசிரியர் சண்முகதாஸ்

பேராசிரியர் சண்முகதாஸ்பல மேடைகளில் தமிழ் புலமையாளராக வரவேற்கப்படும் பேராசிரியர் சண்முகதாஸ் (அருணாசலம் சண்முகதாஸ் – ஆய்வு இலக்கியம் – தோற்றம் – 02.01.1940) அவர்கள் யாழ்ப்பாணப் பல்கலைக்கழகத்தின் தகைசார் வாழ்நாள் பேராசிரியராகவும், தென்கிழக்குப் பல்கலைக்கழகத்தின் மொழித்துறை நிபுணத்துவ ஆலோசகராகவும் இருந்து வருகின்றார். பேராசிரியர் சண்முகதாஸ் அவர்கள் இலங்கையில் உள்ள திருகோணமலையில் 1940 ஆம் ஆண்டு சனவரி மாதம் இரண்டாம் நாள் பிறந்தவர். பெற்றோர் திருவாளர்கள் அருணாசலம் – முத்தம்மாள் ஆவர். இளமைக் கல்வியை திருகோணமலையில் உள்ள பிரான்சிசு சேவியர் பள்ளியில் பயின்றவர்(1945-51). பின்னர் வந்தாறுமூலையில் (செங்கலடி) உள்ள அரசு கல்லூரியில் பயன்றவர் (1952-57). பின்னர் சிவானந்த வித்தியாலயத்தில் பயின்றவர் (1957-59). ”கோகுலம்” பரமேஸ்வரா ஒழுங்கை, திருநெல்வேலியை வாழ்விடமாகவும் கொண்டுள்ள பேராசிரியர் சண்முகதாஸ் 1963 இல் இலங்கைப் பல்கலைக்கழகத்தில் சிறப்புத் தமிழை இளங்கலையில் பயின்றவர். இதில் வரலாறு, சமஸ்கிருதம் உள்ளிட்ட பாடங்களையும் பயின்றார். முதல் வகுப்பில் தேறினார். அதன் பிறகு ஸ்கொட்லாந்தில் உள்ள எடின்பரோ பல்கலைக்கழகத்தில் ( University of Edinburgh, Scotland, United Kingdom.) ஓராண்டு மொழியியல் பயின்றார் (1969 – 1970).1970-72 ஆம் ஆண்டில் மொழியியல் துறையில் எடின்பரோ பல்கலைக்கழகத்தில் முனைவர் பட்டம் பெற்றார். “இலங்கைப் பேச்சுத் தமிழின் வினைவடிவங்களின் ஒலியன்கள்” (Phonology of the Verbal Forms in Colloquial Ceylon Tamil) என்பது இவர் தம் முனைவர் பட்ட ஆய்வுத் தலைப்பாகும்.

இதற்கிடையில் சண்முகதாசு அவர்கள் 1963 இல் இலங்கைப் பல்கலைக்கழகத்தில் தற்காலிக உரையாளராகப் பணிபுரிந்தார். பின்னர் அதே நிறுவனத்தில் துணைப் பேராசிரியராகவும் பணிபுரிந்தார். 1965-68 இல் வட்டுக்கோட்டையில் உள்ள யாழ்ப்பாணக் கல்லூரியில் தமிழ் விரிவுரையாளராகப் பணிபுரிந்தார். 1975 முதல் யாழ்ப்பாண வளாகத்தில் இருந்த இலங்கைப் பல்கலைக்கழகத்தின் கல்லூரியில் தமிழ்ப்பேராசிரியர் பணிபுரிந்தார். 1976 முதல் யாழ்ப்பாணப் பல்கலைக்கழகத்தில் தம் தமிழ்ப்பணியைத் தொடர்ந்தார்.

1982 இல் யாழ்ப்பாணப் பல்கலைக்கழகத்தின் மொழித்துறைத் தலைவர் பொறுப்பு வகித்தார். அடுத்த ஆண்டில் நைஜீரியாவில் உள்ள இபாதன் பல்கலைக்கழகத்தில் மொழியியல் மற்றும் நைஜீரிய மொழியியல் துறையில் வருகைதரு பேராசிரியராகப் பணிபுரிந்தார் (University of Ibadan). 1983 இல் ஜப்பான் டோக்கியோவில் உள்ள காகூசன் பல்கலைக் கழகத்தில் (Gakushuin University) வருகைதரு பேராசிரியராக பணிபுரிந்தார்.

1998 இல் யாழ்ப்பாணப் பல்கலைக்கழகத்தில் துணைவேந்தர் (பொறுப்பு) பணியையும் கவனித்தவர். 2007 வரை யாழ்ப்பாணப் பல்கலைக்கழகத்தில் பல நிருவாகப் பொறுப்புகளையும் கவனித்தவர். 2008 முதல் வருகைதரு பேராசிரியராக யாழ்ப்பாணப் பல்கலைக்கழகத்தில் பணிபுரிகின்றார்.

மானிய ஆணைக்குழுவால் யாழ் பல்கலைக்கழக உயர் பட்டப்படிப்புகள் பீட முதல் பீடாதிபதியாக நியமிக்கப்பட்டவர். தென்னிந்திய பல்கலைக்கழகங்களிலும் கல்விசார் பதவிகளை இவர் வகித்துள்ளார். யாழ் பல்கலைக்கழக ஊடக வளங்கள் பயிற்சி நிலைய முதல் இயக்குனராகவும், சைவவித்தியா விருத்திச் சங்க தலைவராகவும் (1993 – 2003) பணியாற்றியவர் பேராசிரியர் சண்முகதாஸ்.

உலகத் தமிழாராட்சி மாநாடு உட்பட பல வெளிநாடுகளில் இடம்பெறும் கருத்தரங்குகள், மகாநாடுகளுக்கு இலங்கைத் தீவிலிருந்து அழைப்பை ஏற்றுச் சென்று தனது கருத்துரைகளை, ஆய்வுரைகளை வழங்கியுள்ளார். தமிழ்மொழி இலக்கண இயல்புகள், துணைவேந்தர் வித்தியானந்தன், கிறிஸ்தவ தமிழ் இலக்கிய வளர்ச்சி, ஈழத்துத் திறனாய்வு முன்னோடி பேராசிரியர் வி. செல்வநாயகம், இலங்கைப் பேராசிரியர்களின் தமிழ்பணிகள், தமிழின் பா வடிவங்கள், மொழியும் பிற துறைகளும், வண தனி நாயகம் அடிகள், ஆக்க இலக்கியமும் அறிவியலும் (பதிப்பு) ஆகிய நூல்களையும், இத்திமரத்தாள், ஆற்றங்கரையான், World view and Rituals among the Japanese and Tamils ஆகிய நூல்களை கலாநிதி மனோன்மணியுடன் இணைந்து எழுதியுள்ளார். பேராசிரியர் சண்முகதாஸ் அவர்கள் ஆங்கிலத்திலும் பல நூல்களை எழுதியுள்ளார். பேராசிரியர் சண்முகதாஸ் அவர்கள் படிக்கும் காலத்திலும் பணிபுரிந்த காலத்திலும் பல விருதுகளை, பரிசுகளை வாங்கிப் பெருமை சேர்த்தவர். 1963 இல் ஆறுமுகநாவலர் விருது இலங்கைப் பல்கலைக் கழகத்தில் முதல் மாணவராகத் தேறிப் பெற்றவர். 1987 இல் கொழும்புத் தமிழ்ச்சங்கத்தில் தமிழ்மொழி இலக்கண இயல்புகள் என்ற தம் நூலுக்காகச் சபாரத்தினம் நினைவுப்பரிசு பெற்றவர். யாழ் இலக்கிய வட்டப் பரிசு, யாழ்ப்பாணப் பல்கல்லைகழகத்தில் இருபத்தைந்தாண்டுகள் தொடர்ந்து பணிபுரிந்தமைக்கு இரண்டு முறை பணப் பரிசு பெற்றவர். யுனெசுகோ விருது ஒன்றும், இலங்கை அரசின் சாகித்ய ரத்னா விருது ஒன்றும் பெற்ற பெருமைக்கு உரியவர்.
இலங்கையில் உள்ள பல்வேறு கல்வி நிறுவனங்களில் கல்விக்குழு, பாடத்திட்டக்குழு, மதிப்பீட்டுக்குழு எனப் பல நிலைகளில் பணிபுரிந்தவர். அயல்நாட்டுப் பல்கலைக்கழகங்கள் அனுப்பும் முனைவர் பட்ட ஆய்வேடுகளை மதிப்பிடும் தேர்வாளராகப் பணிபுரிந்த பெருமைக்கு உரியவர். சிந்தனை என்னும் இதழின் தலைமைப் பதிப்பாசிரியராகப் பணிபுரிந்தவர்.

பேராசிரியர் சண்முகதாஸ்

அக இலக்கியமும் அறிவியலும் என்னும் தமிழ்த்துறை வெளியிட்ட நூலின் பதிப்பாசிரியராக இருந்து கடமையாற்றியவர். உலக அளவில் நடைபெற்ற பல உலகத் தமிழ்மாநாடுகளைக் கண்ட பெருமைக்கு உரியவர். அவ்வகையில் சென்னை, பாரிசு, மலேசியா, சிங்கப்பூர், தமிழகம் மொரீசியசு உள்ளிட்ட நாடுகளுக்குச் சென்று கட்டுரை படைத்த பெருமைக்கு உரியவர். பல நாடுகள் சுற்றி வந்தாலும் தமிழ் அரங்குகளில் தமிழர் ஆடையான வேட்டியணிந்து அமர்ந்து வீற்றிருப்பது இவர்தம் தமிழ் உணர்வுகாட்டும் சான்றாகும். இலங்கை நாட்டுப்புறப்பாடல்களைப் பாடிக்காட்டி விளக்கும் ஆற்றல்பெற்றவர்.

தமிழ் தொடர்பிலான கருத்தரங்குகள் எந்தப் பொருளில் எங்கு நடந்தாலும் கலந்துகொண்டு கட்டுரை படித்துத் தம் ஆய்வுத்திறமையால் அனைவரது உள்ளத்திலும் இடம்பிடிக்கும் இலக்கிய இணையர்கள் பேராசிரியர் அ.சண்முகதாசு அவர்களும் முனைவர் மனோன்மணி சண்முகதாசு அவர்களும் ஆவார்கள். இவர்கள் இலங்கையை மையமிட்டு வாழ்ந்தாலும் உலக அளவில் அனைவருக்கும் அறிமுகமானவர்கள் ஆவர். இவ்விரு பெருமக்களின் தமிழ்ப்பணிகள் குறிப்பிடத்தக்கபெருமைக்கு உரியனவாகும்.

சங்க இலக்கியம், இலக்கணம், மொழியியல், நாட்டுப்புறவியல், இலக்கியத் திறனாய்வு, பக்தி இலக்கியம், வரலாறு, கல்வெட்டு எனத் தமிழின் அனைத்துப் பரிமாணங்களையும் உள்ளடக்கிய ஆய்வுப் புலங்களில் தடம்பதித்து ஆய்வுலகில் தனக்கென ஓர் இடத்தைத் தக்க வைத்துக் கொண்டுள்ள இவர்களின் வாழ்க்கையை இங்கு அறிவோம்.

By – Shutharsan.S

நன்றி- தகவல் மூலம் – நல்லூர் பிரதேச கலாச்சாரப் பேரவை, பிரதேச செயலகம், நல்லூர் – 2009 வெளியீடுகள் மற்றும்

http://kizkkuman.blogspot.com இணையம்.

2 reviews on “பேராசிரியர் சண்முகதாஸ்”

  1. imthiyaz says:

    ஐயா …
    மொழியியலுக்கும் உளவியலுக்கும் இடையில் தொடர்பு இருக்கின்றதா ?
    ஏதும் புத்தகங்கள் ?

  2. பேராசிரியரிடம் கலந்தாலோசித்து விட்டு கூறுகிறேன்.

Add your review

12345